Russia rebus Estoniae intervenit
: Nuntii Latini

04.05.2007, klo 10.45

Russi Estoniensibus de statua notam diplomaticam dederunt et delegatos Dumae sive parlamenti Tallinnam miserunt.

Illi delegati, ubi primum pervenerunt, nomine Dumae eodem die bis flagitaverunt, ut regimen Estoniae discederet.

Kristina Ojuland, vicepraeses parlamenti Estonici, mirabatur, quaenam futurae essent proximae nationes sodales NATOnis et Unionis Europaeae, a quibus idem flagitaretur.

Urmas Paet, minister a rebus exteris Estoniae, recusavit, quominus delegatos Russos reciperet.

Censebat nullam causam esse talem delegationem convenire, cuius membra rebus Estoniae interioribus intervenire temptavissent.

Estones quidem cum Russis colloquia sincera habere voluisse, sed proposita delegationis prorsus alia fuisse.