Memoria stragis Matritensis
: Nuntii Latini

16.03.2007, klo 09.06

Die Dominico (11.3.) tres anni acti erant ab ictu terroristico funestissimo in urbe Matrito effecto, quo paene ducenti homines occisi et amplius mille octingenti sauciati sunt.

Ad memoriam mortuorum recolendam in uno ex iis tribus locis, quibus facinus perpetratum erat, monumentum vitreum cylindroides revelatum est: inter caerimoniam, cui etiam rex Hispaniae Iohannes Carolus cum coniuge Sophia aderat, silentium triste quinque minutarum actum est.