Fodinae in Sinis periculosae
13.01.2006

Regimini Sinarum est propositum claudere quinque milia ducentas nonaginta fodinas carbonis.

Iam antea moderatores Sinenses praeceptis monitisque contenderunt, ut securitas fodinarum melior redderetur, sed haud multum effecerunt.

Fodinae Sinensium periculosissimae in toto orbe terrarum sedes operis adhuc sunt. Incendiis, explosionibus aliisque calamitatibus in fodinis factis plus quina milia operariorum singulis annis moriuntur.

Magistratus dicunt maiorem partem calamitatum in fodinis parvorum vicorum fieri. Nunc autem consilium captum est, ut condiciones securitatis plus duodecim milium fodinarum carbonis accuratius examinarentur et inspicerentur.

Tuomo Pekkanen
Nuntii Latini, Finnish Broadcasting Company (YLE)
(used with permission)

... and for news in that other Classical language, Akropolis World News has a new entry ... latest headline: Olmert, in control of Israel's "nuclear briefcase" - Museum loses 38-ton sculpture