Simon Wiesenthal obiit
23.09.2005

Simon Wiesenthal, pertinax persecutor nazistarum nefariorum, annos natus nonaginta sex Vindobonae diem supremum obiit.

Confecto secundo bello mundano Wiesenthal plus mille centum apparitores et satellites Adolphi Hitler, inter quos notissimus erat Adolphus Eichmann, in iudicium arcessendos et damnandos curavit.

Quattuor annos et dimidium in campo concentrationis fuerat, unde cum coniuge vivus evasit, etsi prope nonaginta propinquos amisit.

Tarja Halonen, praesidens Finniae, res a Wiesenthal gestas laudavit et monuit magni esse ad conscientiam generis humani, quod atrocia scelera in abscondito non manerent.